Philemon

1Wasika ye gmi n mi aba nu Nabari manayi Yesu Kristi nya ɓo, ɓedo Omi zadoyi, Timatawus. 2Kwoi lo Filimon aba, eyi tnu-tnu kun-zhinyi, oza ye-yeyi, n ikklisiya yi n kwo zhin kwa yezhi n eho puwa nyi, n Abfiya eyi mapui ɓedo n Arkibbusa yi n wo zhin Yesu soja n gye mi nyi. 3Fa Shekwoyi eyi Dada n Dagayi Yesu Kristi yi wa ga fye owo anabarka n bugba-fuyi.

Bulus Wyegyi

4Mi zhin Shekwoyi godiya cici esa n ma zhin aduwa ntu ho ɓo, Filimon, omi ʼza ye-yeyi. 5Gama mi wo oho ye-ye n kpemayi ɓo lo n Dagayi Yesu n wo aza yi. 6Mi zhin aduwa mi gna aza oho gaiciya ga ɓo, kwo ɓa shi ɓa wye-wyeyi ce, shi ɓa gye anya a manayi n ho, n ɓa kun n Kristi Yesu aba nyi. 7Omi n mihin mila gyiba bwa, bugba buyi nya n emi fuyi n ho ye-yeɓo, emi zado, ntuge oho ɓemana-zhin, bma Shekwoyi aza bugba zhin lo.

8– 9Nsaiye, miye ma nyaho bmazhin gmanyi. Mi ɓa mi ma nya ho ce dna n Kristi, gama nya manayi nu, n kwo kunce ha zhin. Ama mi ye ho lo, mi gnaye ma nya ho. Omi, Bulus, zakwoyi n saiye dna n kurkuku ntu Yesu Kristi ɓo. 10Omi wyegyi, nge, ha wu Onisumus alheri, n na gniwo ga Yesu dna n ya, mi yi dna n na agmanyi. 11Onisumus nwo maʼana ge, (“Apma”) wo to ɓei n na apma yin n sapain, ama nsaiye wo n na apma hin-hin yi lo, n yi aba vinya. 12Mi tnu n woi n ho aba njesun, emi bugba gnisun lo n woi.

13Mi ɓei n cei pma ma wo shi n ya, esa n mi dna n cei n ya n na agma, ntu Nabari manayi waʼazi zhin ɓo, owo bmazhin ɓei ɓa ze ngye oho nu bma mi zhin. 14Ama mi to ɓei n cei pma ma zhin ce n tna ho ayen. Mi to ɓei n cei pma ha zhin ɓemana tilas nun, ama n ho bugba yei. 15Kpekni ho ɓa zhin kwo nubo n lai, nge wa busi n ha aba esa fyewyi ntuge wa ze oho nya nyalonyalo. 16Wo to ye zhin fyenu nu, ama nyaho n du ɓo, Madoyi ye-yei, tun baga n mi aba ba, nsaiye wo ɓa gna sun n na pmayi n ho aba, ntuge wo to zhin fyenu nun gmanyin, ama oho mado dna n Kristi.

17Nmi zhin ho nugundo hin-hin yi nu, gwo wo n na agmadai, shi ho ɓa gwo mi nyi, emi yi nu a ɓe ho aba. 18Ngye wo ku ɓenukwoyi nu zhin ho, kwo wa wyi ho vi nu, ɓi mi nu ta, mi ɓa gba ho. 19Mi ɓa gba ho kwo ta, (“emi Bulus mi la ye mi ɓa gaho, cenu zhin mi yi kakwo fi n ya n mi abwayi,”) Mita wu ho shi ho n tayi shi mi lon, Ɓehin-hin ho n hohin wye-wyeyi tainu shi mi. 20E, emi zado ye-yei, gami agmada dna n ye-ye n na bai emi bugba ɓa ci Dagayi.

21Mika wasika ye ntuge mi kpelo ho ɓa zhin oɓo n ma gna ho, har n diya ɓo.

22La a zhiɓei nyakun zhin aba gami, gama mi n na wyetuyi lo Shekwoyi ɓa wo fye aduwa ma ɓe fye aba esa fyewyi.

23Abafros emi kurkuku kun zhinyi, n wo dnalo n ya, ntu n Kristi Yesu waʼazi zhin ɓo nyi, wo tnu fye lo n gnaviyi. 24N Markus yi, Aristakus yi, n Dimas yi n Luka yi, emi atnu-tnu kun zhin yi.

25Anabarka eyi Dagayi Yesu Kristi nya ɓa kunsun n ho zafunyi.